狂風首先響起左前奏, 雨聲令我既注意力再度分散, 走左出去露台觀雨。雨似雨, 又不似雨。初聽之下,雨聲就是雨聲, 突然雨聲變了沙鎚聲,然後一下閃電, 又一下,就好像要說明佢係特別既。 不知何時,雨聲又變回雨聲。
回想最初對雨既印象,就係細個阿媽買左一套黃色既雨衣同雨BOOT, 但係等左好耐都無落雨。過左好似三年咁耐, 終於可以穿甲上陣。雖然同樣都係返學日,但係係雨水陪伴之下就變得有趣得多。雨聲就好似無數既朋友不斷同你傾計,你只要細心傾聽,就可以聽到佢地既言語。冰涼既雨水隔住雨衣都可以感受到,令夏日既刺熱感完全消退。青蛙既叫聲取代左吵耳既蟬聲,好似氣定神閒咁唱緊歌。雨聲又掩蓋左人們煩燥既談話聲,感覺就好似去左熱帶雨林,平時既不自覺既壓力消去得無影無終。我, 愛雨。
回到現實,蛙叫聲已經聽唔到, 換黎既黎低沈既船鳴聲, 可能它在悲叫吧? 在這七百萬人的都市中,也許只有我聽到, 但我又能做什麼? 破!! 突然雷聲一響,喝止了雨, 也喝止了夢。
又,雨停了又落, 就好似女人既心情咁, 永遠都睇唔通。